Фотасправаздача «Абрадавае мерапрыемства «Вялікдзень»

16 красавіка 2017 года
з 14:00 да 15:30

Вялікдзень – вялікае вясновае свята, карані якога вядуць у глыбокую старажытнасць. Гэтым святам некалі адкрываўся новы каляндарны год. Пазней царква замацавала яго ў сваім «рухомым» велікодным календары.

Галоўным сімвалам Вялікадня з’яўляецца яйка, якое ўвасабляе народныя ўяўленні пра жыццё, сонца, абуджэнне прыроды, перамогу жыцця над смерцю. Свята пачынаецца з «усяночнай», пад час якой у храмах свяцілі пірагі, мак, мяса, пафарбаваныя і размаляваныя яйкі і інш. Раніцай хадзілі глядзець на «гульню» сонца, пафарбаванымі яйкамі гулялі ў «біткі», гушкаліся на арэлях, вадзілі карагоды.

Адной з асаблівасцяў беларускага Вялікадня з'яўляецца традыцыя «хаджэння валачобнікаў» у ноч з першага на другі дзень. Звычайна валачобнікі віншавалі гаспадароў хаты са святам, жадалі ім здароўя, прыбытку, добрага ўраджаю.