З нагоды ўрачыстага святкавання  Дня Незалежнасці Рэспублікі Беларусь і для ушанавання памяці ветэранаў Вялікай Айчыннай вайны, што прымалі ўдзел у вызваленні Беларусі ад нямецка-фашысцкіх захопнікаў музей прэзентуе часовую выставу дакументаў і ўзнагарод ваеннага фельчара Цімафея Рыгоравіча Буева.

Цімафей Рыгоравіч нарадзіўся 10 лютага 1909 г. у в. Стражава, Аршанскага павета, Магілёўскай губерні. У 1928 г. скончыў 7 класаў школы. У 1931 г. яго прызываюць на службу ў войска і накіроўваюць у школу санітарных інструктараў. З 1934 па 1935 гг. Цімафей Рыгоравіч праходзіць навучанне ў Ленінградскай школе ваенных лекарскіх памочнікаў пры Ваенна-медыцынскай акадэміі. Пасля заканчэння школы ён накіраваны сярэднім медработнікам 10 танкавай брыгады горада Барысаў, дзе праслужыў да верасня 1939 года. Удзельнічае ў вераснёўскім паходзе Чырвонай Арміі, вынікам якога стала ўз’яднанне Заходняй Беларусі з БССР.

У 1940 годзе яго прымаюць у члены Усесаюзнай камуністычнай партыі (бальшавікоў). Перад вайной Цімафей Рыгоравіч служыць у горадзе Каўнас, дзе пражывае разам з сям’ёй - жонкай Надзеяй Цімафееўнай і дзецьмі: дачкой Верай і сынам Генадзем.

З 1941 па 1945 гг. Цімафей Рыгоравіч – удзельнік Вялікай Айчынай вайны, служыць у франтавым сартыравальным эвакуацыйным шпітале Заходняга, а з 1944 года - 3-га Беларускага франтоў, удзельнічае ў вызваленні Беларусі.

За ўдзел у баях пад час Вялікай Айчыннай вайны Цімафей Рыгоравіч узнагароджаны двума ардэнамі: "Красной звезды", "Красного знамени", медалямі "За оборону Москвы", "За боевые заслуги", “За Победу над Германией” і інш. Скончыў вайну ён у званні капітана медыцынскай службы.

Выстава праз дакументы, узнагароды, асабістыя рэчы Цімафея Рыгоравіча Буева, правядзе дарогамі яго няпростага жыцця ў мірны і ваенны час, пазнаёміць з лёсам аднаго чалавека, як адной са шматлікіх старонак гісторыі, падобных і адначасова непаўторных, што складаюць альманах гістарычнае памяці беларускага народа.