Фотасправаздача «Каляды ў Беларускім скансэне!»

24.12.2016 

Фота Марыны Варабей

Беларускі дзяржаўны музей народнай архітэктуры і побыту запрашае 24 снежня 2016 года з 13:30 да 16:00 на святкаванне аднаго з найцікавейшых беларускіх абрадаў – «Каляды».

Каляды – старажытнае свята, якое паходзіць яшчэ з дахрысціянскіх часоў і прымеркавана да зімовага сонцастаяння. Менавіта ў гэты час абвастралася барацьба цёмных і светлых сіл сусвету. Да гэтага свята старанна рыхтаваліся: назапашвалі прадукты, прыбіралі хату і гаспадарчыя пабудовы, моладзь майстравала маскі і карнавальныя касцюмы, усе мыліся і апраналіся ў святочнае адзенне.

Неад’емнай часткай свята лічылася «калядаванне» – святочны абыход двароў гуртом ражаных з віншаваннямі і выкананнем калядных песень. За гэта ўдзельнікі абраду атрымлівалі ад гаспадароў пачастункі. Усё гэта забяспечвала багаты ўраджай, здароўе і шчасце людзям на наступны год. У аснове звычая ляжыць старажытная аграрная абраднасць, агульным прызначэннем якой было паскарэнне надыходу цяпла і забеспячэнне добрага ўраджаю ў новым гаспадарчым годзе пры дапамозе магічных дзеянняў і заклінанняў.

Навуковымі супрацоўнікамі музея, сумесна са студыяй «Варгін» на свяце будзе прадстаўлена рэканструкцыя каляднага абраду з тэрыторыі Рэчыцкага Палесся. Калядныя традыцыі іншых этнаграфічных рэгіёнаў праілюструюць творчыя калектывы кафедры этналогіі і фальклору БДУКМ.

У праграме свята:

• Інтэрактыўная праграма «Каляды ў нашым Сяле»;
• Майстар-класы;
• Канцэрт-фэст дзіцячых і моладзевых гуртоў;
• Традыцыйная Батлейка;
• Калядны квэст «Ажыві казу»;
• Частаванне абрадавай кашай, «Куццёй», і травяным узварам;
• Народныя танцы, карагоды і забавы;
• Сапраўдныя калядныя варожбы і многае іншае.

Увесь час на тэрыторыі музея грае беларуская народная музыка ў выкананні калектываў «Жвавы Карчмар», дзіцячага фальклорнага калектыву «Мілавіца» ЦДАДіМ «Ветразь».

Кошт квіткоў:

• 8,00 руб. – для дарослых;
• 5,00 руб. – для студэнтаў сярэдне-спецыяльных і вышэйшых навучальных устаноў;
• 3,00 руб. – для дзяцей школьнага ўзросту;
• бясплатна – для дзяцей дашкольнага ўзросту.

Экспазіцыя музея працуе з 10:00 да 17:00. Каса музея працуе з 10:00 да 16:30.