19 верасня ў 15.00 Беларускі дзяржаўны музей народнай архітэктуры і побыту запрашае ўсіх стаць удзельнікамі свята «Багач заткнуў у страху рагач».

«Багач» — гэта свята, якое завяршае цыкл збору ўраджаю і мае глыбокае сацыяльна-абрадавае значэнне. «Багач» уяўляў сабой лубку з жытам, у сярэдзіну якой ставілі свечку. Жыта для абраду прыносілі жыхары ўсёй вёскі. Лубку з жытам і запаленай свечкай у суправаджэнні ўсіх жыхароў абносілі вакол усёй вёскі і вакол статка жывёл. Затым удзельнікі абраду ўрачыста ўносілі «багач» у дом, дзе ён захоўваўся ўвесь наступны год. Абрад быў накіраваны на захаванне дабрабыту, ураджайнасці, плоднасці жывёлы і сямейнага парадку.

Беларускі дзяржаўны музей народнай архітэктуры і побыту запрашае ўсіх жадаючых далучыцца і стаць часткай свята «Багач».

У праграме мерапрыемства:

• Аповяд пра традыцыі свята «Багач»;
• Святочны абыход вёскі;
• Майстар-клас па малацьбе і правейванні збожжа;
• Традыцыйныя песні;
• Народныя танцы і гульні.