Агарод лекавых раслін у сядзібе з вёскі Садавічы Капыльскага раёна

Народную медыцыну называюць прамаці навуковага лячэння хвароб. Лекавыя расліны былі вядомы яшчэ з далекай мінуўшчыны і шырока выкарыстоўваліся на Беларусі. Народнае знахарства мы разглядаем як звяно традыцыйнай культуры, у змесце якога закладзены не толькі інфармацыйны пачатак па знахарству, але і захаваны глыбокі пласт духоўнай культуры, якая цесна звязана з абраднасцю, правіламі побыту, культурай і асаблівасцямі традыцыйнага харчавання. Таямніцамі лекавых раслін валодалі ведуны, знахары, кастаправы. Сабраныя рэцэпты і веды старанна ахоўваліся і перадаваліся з пакалення ў пакаленне. З развіццём пісьменнасці накопленыя практычныя навыкі фіксаваліся ў рукапісных кнігах, а пазней друкаваліся ў спецыяльных выданнях.

У народнай медыцыне мінулага выкарыстоўвалася больш за тысячу раслін. Цяпер у айчыннай медыцыне ўжываецца не больш за 200 відаў. На тэрыторыі Беларускага дзяржаўнага музея народнай архітэктуры і побыту растуць 155 відаў лекавых раслін, некаторыя з іх занесены ў «Чырвоную кнігу Рэспублікі Беларусь». Пра захоўванне гэтых раслін трэба клапаціцца своечасова. Менавіта таму вынікам працы супрацоўнікаў ландшафтна-этнаграфічнага аддзела стала стварэнне агарода лекавых раслін у комплексе пагоннага двара з вёскі Садавічы Капыльскага раёна. Тут сабраны як найбольш цікавыя расліны прыроднай флоры Беларусі, так і інтрадуцыраваныя (прывезеныя), якія вельмі добра адаптаваліся да прыродных умоў нашай краіны. Акрамя таго, дадзеныя расліны маюць цудоўныя дэкаратыўныя ўласцівасці. На сённяшні дзень калекцыя раслін налічвае 37 відаў, 9 з якіх знаходзяцца пад аховай.

1. Алтэя лекавая;
2. Меліса лімонная;
3. Бадан таўсталісты;
4. Мацярдушка звычайная;
5. Валяр’ян лекавы;
6. Любіста лекавая;
7. Рэвень;
8. Чабор;
9. Рута пахучая;
10. Лаванда лекавая;
11. Герань карэнішчавая;
12. Сатурэя горная (чабер горны);
13. Ісоп;
14. Цыбуля скарада (шніт-цыбуля);
15. Верас звычайны;
16. Радыёла ружовая;
17. Мята перцавая;
18. Кацямятка каціная;
19. Браткі;
20. Эхінацея;
21. Палын лекавы;
22. Півоня;
23. Крывасмок лекавы;
24. Шыпшына;
25. Адоніс веснавы;
26. Медуніца лекавая;
27. Падалешнік еўрапейскі;
28. Ворлікі звычайныя;
29. Кадзіла сармацкае (катэгорыя аховы 3);
30. Першацвет высокі (катэгорыя аховы 3);
31. Цыбуля мядзведжая(катэгорыя аховы 3);
32. Касач бязлісты (катэгорыя аховы 1);
33. Касач сібірскі (катэгорыя аховы 4);
34. Кураслеп лясны (катэгорыя аховы 4);
35. Пальчатакарэннік (катэгорыя аховы 3);
36. Лілея кучаравая (катэгорыя аховы 4);
37. Пралеска звычайная (катэгорыя аховы 4).

Працяг будзе!

Таўлай Святлана Вікенцьеўна,
загадчык ландшафтна-этнаграфічнага аддзела.