Дарагія сябры! Мы працягваем серыю публікацый пад агульнай назвай #строчыцкія гісторыі, у якіх распавядзем малавядомыя старонкі гісторыі помнікаў драўлянага дойлідства, што экспануюцца на тэрыторыі музея, узгадаем імёны гаспадароў музейных сядзіб, а таксама адкрыем для вас розныя цікавосткі з архіўных хронік рабочай групы БДМНАіП, у тым ліку старыя фотаздымкі з экспедыцый. Сачыце за абнаўленнем!

***

Гісторыя царквы з в. Логнавічы

Драўляная царква размяшчалася на могілках бліз в. Логнавічы Заастравецкага сельсавета Клецкага раёна. У гістарычных дакументах лічылася Астроўчыцкаю, так як адносілася да фальварка Вялікія Астроўчыцы. Царква пабудавана не раней за 1784 г., кліравыя ведамасці сяр. ХІХ ст. паведамляюць аб наяўнасці пры царкве званіцы, прастоле ў імя Пакрова Багародзіцы, а таксама аб адсутнасці пры царкве пабудоў для кліра і пасрэдным царкоўным начынні. Царква не ўтварала прыхода, была прыпісной да морацкай ( царква Ушэсця Гасподняга, в. Морач). Па звестках старажылаў апошні рамонт царквы адбыўся “за польскім часам”.  У пач. 1930-х гг. да яе былі прызначаны святар і д’якан, але ў 1935 г. у суседнім Заастравеччы была асвечана Дыянісійская царква, куды перайшлі служыць логнавіцкія святары. Пасля 1935 г. набажэнствы ў царкве праводзіліся рэдка, апошняе было спраўлена яшчэ ў 1950-х. гг.

На момант фіксацыі царква мела значныя пашкоджанні, у помніку абвалілася страха над нэфам і апсідай, моцна пашкоджанай была падлога, фундамент цалкам паглыбіўся ў зямлю. У працэнтных адносінах ступень зносу канструктыўных элементаў складала:

1. Фундамент – 100%
2. Сцены – 40%
3. Шалёўка – 50 %
4. Страха – 85 %
5. Падлога – 70 %

Рамонтна-рэстаўрацыйныя работы праводзіліся ў 1985-1986 гг.

Тэматыка-экспазіцыйны план Пакроўскай царквы аўтарства У. Шаставец – сінтэз навуковай працы па вывучэнню гістарычных крыніц, аналізу архітэктурных даследванняў, матэрыялаў этнаграфіі, культуралогіі і мастацтвазнаўства – узор комплекснай работы па распрацоўцы канцэпцыі музеефікацыі помніка драўлянага дойлідства.

Па матэрыялах Шаставец і дзякуючы працы нашчадкаў у пазнейшыя гады, у 2013 г. у Логнавіцкай царкве адноўлены інтэр’ер.