Для наведвальнікаў

Дарагія госці! Шпацыруючы па музейнай тэрыторыі, вы можаце выявіць, што некаторыя аб'екты зачыненыя для наведвання. Гэта робіцца для таго, каб зменшыць эксплуатацыйную нагрузку на будынак, захаваць на доўгія гады маснічыны, парогі, дзвярныя палотны і завесы. Часамі аб’екты знаходзяцца ў стане бягучага альбо капітальнага рамонту, які дазваляе прывесці помнікі ў належны экспазіцыйны стан.

Кожны помнік архітэктуры ў экспазіцыі – аб'ект культурнай спадчыны ўзростам больш за сто гадоў (ёсць сярод іх і сапраўдныя «мастадонты», якія жылі яшчэ тры стагоддзі таму). Драўляныя канструкцыі хутка зношваюцца пры пастаянным наведванні людзьмі (нашы продкі і думаць не маглі, што да іх прыйдзе столькі гасцей!).

Таксама ў помніках Вы можаце наткнуцца на пластыкавую перагародку, якая зачыняе праход у пакой. Гэта неабходна для захавання музейных прадметаў, кожны з якіх з'яўляецца сапраўдным артэфактам і ўключаны ў Музейны фонд Рэспублікі Беларусь. У нашым музеі няма вітрын, таму перагародка – адзіны спосаб засцерагчы захаванасць музейнага прадмета ад нядобрасумленных наведвальнікаў (упэўненыя, што да Вас гэтае азначэнне не адносіцца).

Нам вельмі важна максімальна падоўжыць жыццё кожнаму з нашых помнікаў, захаваць культурную спадчыну і для нашых праўнукаў, таму просім з разуменнем паставіцца да абмежаванняў і выконваць правілы наведвання музея і гэтыя рэкамендацыі.

Жадаем Вам прыемнага баўлення часу і дзякуй, што наведалі наш музей.

Калектыў навукова-экспазіцыйнага аддзела Беларускага дзяржаўнага музея народнай архітэктуры і побыту.