17 лістапада 2023 г.

У 13.00.

Помнік архітэктуры “Спаса-Праабражэнская царква з в. Барань”.

З нагоды надання ў 2022 г. беларускаму саломапляценню ганаровага статуса нематэрыяльнай спадчыны чалавецтва, калектыў музея рады абвясціць адкрыццё часовай экспазіцыі “Поўны клеці карабамі…”

Выстава працуе  з 17 лістапада 2023 г.

“Радзі, сонца, жыта і пшаніцу,

Поўны гумны стагамі!

Радзі, сонца, жыта і пшаніцу,

Поўны клеці карабамі!”

У тэкст гэтай жніўнай песні ўкладзены і прадуцыруючая магія слова, і падзяка ніве за добры ўраджай. Канец восені ў традыцыйнай беларускай культуры – час сканчэння земляробчых хлопатаў і падсумоўвання вынікаў цяжкай сельскагаспадарчай працы. Сабраны ўраджай абумоўлівае жыццё сям’і на бліжэйшую зіму, і нішто так не цешыць дбайнага гаспадара, як клець, застаўленая карабамі з жытам, гароднінай, грыбамі. Менавіта аб іх – карабах, шыянах, гарнцах – сціплых памочніках сялянскай сям’і, распавядзе новая экспазіцыя музея.

У ёй прадстаўлены каля 40 прадметаў побыту, створаных тэхнікай спіральнага пляцення – адной з формаў традыцыйнага саломапляцення, што ў пачатку ХХ ст. сустракалася па ўсёй тэрыторыі Беларусі і атрымала найбольшае распаўсюджанне ў Віцебскай, Гродзенскай і Брэсцкай абласцях.

Тэхналагічны спосаб іх выканання заключаецца ў тым, што жгуты саломы, пачынаючы з донца, выкладваюцца па спіралі і сшываюцца паміж сабой гнуткімі расчэпленымі пруткамі лазы, палоскамі лыка, яловымі ці сасновымі каранямі, ніткамі з раслінных валокнаў. Шчыльна сплеценыя карабы не саступалі па трываласці драўляным бочкам, часта былі так па-майстэрску выкананы, што не прапускалі налітую ў іх ваду, разам з тым забяспечвалі неабходную для захавання зерня і мукі вентыляцыю.

У традыцыйным побыце саламяны кораб - перш за ўсё практычная ўтылітарная рэч, але ў сучаснай каштоўнаснай парадыгме - твор народнага мастацтва. Плеценыя з саломы каробкі маюць выразную, дасканалую форму, а дробны дыяганальны ці спіральны ўзор лазовага перапляцення на жгутах ажыўляе фактуру самаго вырабу, робіць яго паверхню прыгожай. Хоць у мастацкіх адносінах плецены саламяны посуд не так уражвае, як вырабы дэкаратыўна-абрадавага прызначэння і аб’ёмная пластыка, аднак вытокі рамяства, аснова для развіцця ўсіх іншых відаў і формаў, пачынаюцца з яго.

Запрашаем усіх ахвочых наведаць новую экспазіцыю музея.

За дадатковую плату можна:

- набыць сувеніры ад народных майстроў;

- наведаць «Беларускую карчму», якая знаходзіцца на тэрыторыі музея.

Кошт квіткоў:

• для дарослых – 10,50 руб.;
• студэнтаў вышэйшых устаноў адукацыі (студэнцкі білет) – 5,50 руб.;
• для школьнікаў, навучэнцаў прафесійна-тэхнічных, сярэдне-спецыяльных устаноў адукацыі – 5,50 руб.;
• для дзяцей дашкольнага ўзросту – бясплатна.

Экспазіцыя музея працуе з 10:00 да 17.00. Каса працуе з 10:00 да 16:30.

Шаноўныя наведвальнікі!

• Калі ласка, паклапаціцеся аб абутку і вопратцы згодна ўмоў надвор’я.
• Музей пакідае за сабой права адмены ці замены асобных эпізодаў мерапрыемства ў залежнасці ад умоў надвор’я.
• На тэрыторыі музея адсутнічае банкамат. Для набыцця сувеніраў у рамеснікаў неабходна мець пры сабе наяўныя грошы. Квіткі і сувеніры ў касе вы можаце набыць па безнаяўным і наяўным разліку.

Як нас знайсці?

Музей знаходзіцца ў 4-х км ад МКАД за аўтарынкам «Малінаўка» каля аг. Азярцо.

Праезд ад аўтастанцыi «Паўднёва-Заходняя» прыгараднымі аўтобусамі ў накірунках: Мiнск –Дубянцы, Заходнія могілкі (170Э), Чыкі; маршрутнае таксі №1277.