Фотасправаздача "А КАЛІ ШТО ЯКОЕ, ДЫК ШТО ТУТ ТАКОЕ"

29.05.2016 

Тэатралізаванае прадстаўленне з песнямі, танцамі і гульнямі.

29 мая ў Беларускім дзяржаўным музее народнай архітэктуры і побыту адбылося тэатралізаванае фальклорнае прадстаўленне студэнтаў Беларускага дзяржаўнага універсітэта культуры і мастацтваў (БДУКМ) пад кіраўніцтвам прафесара С.В. Гуткоўскай.

Правядзенне штогадовых фальклорных спектакляў, накіраваных на аднаўленне і захаванне знікаючых народных танцаў, абрадаў і гульняў, з’яўляецца шматгадовай традыцыяй кафедры харэаграфіі. Гэтаму папярэднічае крапатлівая даследчая работа па пошуку інфармацыі ў архівах Галіновай навукова-даследчай лабараторыі беларускай танцавальнай творчасці БДУКМ, якая была сабрана ў палявых экспедыцыях студэнтамі кафедры ў 80-90-х гг. XX ст.

Арыгінальны праект «А калі што якое, дык што тут такое», які ўключае элементы харэаграфічнага, тэатральнага і вакальнага мастацтва, дазволіць не толькі атрымаць асалоду ад прадстаўлення на адкрытым паветры, але і стаць яго арганічнай часткай, акунуцца ў сусвет нашых продкаў, дасць магчымасць сутыкнуцца з рознымі жанрамі народнай творчасці – гульнямі і загадкамі, прыказкамі і прымаўкамі, заклічкамі і лічылкамі. Беларускі дзяржаўны музей народнай архітэктуры і побыту - гэта магчымасць прасякнуцца ўнікальнай атмасферай аўтэнтычнай вёскі, пазнаёміцца з узорамі традыцыйнага беларускага інтэр'ера.

Над стварэннем і рэалізацыяй праекта работалі:

• Ансамбль кафедры харэаграфіі БДУКМ (мастацкі кіраўнік С.В. Гуткоўская, музычны кіраўнік Е.У. Ільіна)
• Студэнты і выкладчыкі кафедры рэжысуры абрадаў і свят факультэта традыцыйнай беларускай культуры і сучаснага мастацтва
• Студэнты і выкладчыкі кафедры народнага дэкаратыўна-прыкладного мастацтва факультэта традыцыйнай беларускай культуры і сучаснага мастацтва
• Ансамбль “Грамніцы” (мастацкі кіраўнік – прафесар У.К. Зіневіч).

Мы верым, што фальклор жыве і дынамічна развіваецца вакол нас!

Кошт квіткоў:

80 000 руб. – дарослыя, 40 000 руб. – школьнікі, сямейны білет (2 дарослых + 2 дзіцяці) – 200 000 руб.