Каля школы – гаспадарчая пабудова – запасны магазін з вёскі Касарычы Глускага раёна Магілёўскай вобласці. У архіўных дакументах упершыню сустракаецца пад 1847 годам.
Пабудова для захоўвання зерня – страхавога запасу грамады на выпадак няўроду. Падпарадкоўваліся запасныя або хлебныя магазіны Камісіям народнага харчу. Выбіраліся наглядчыкі, якія вялі магазінныя кнігі, дзе ўлічвалі прыход і расход зерня. Зруб помніка з брусу хваёвых парод без імшэння на каменным падмурку. З двух бакоў скразнога праезду ў ім зроблены засекі, куды з абхадной галерэі засыпалі зерне.