Яшчэ адна вёска на Случчыне, якая мае дачыненне да гісторыі “выбранцаў” – вёска Агароднікі. Менавіта адтуль перавезена наступная сядзіба пачатку ХХ ст. Гэта яшчэ адзін тып аднараднай забудовы, які ілюстрыруе працэс далейшага развіцця пагоннага двара. Уяўляе сабой трохкамернае жыллё (хата-сені-клець), якое праз паветку злучаецца з пабудовай варыўні з сенечкамі. У склад сядзібы уваходзіць таксама хлеў з прыбудаваным каля тарцовай сцяны птушнікам.
У хаце жыла сям’я Савановічаў ¬– Васіль Аляксеевіч (1889 — 1963), яго жонка Франя Паўлаўна (1900 — 1988) і пяцёра дзяцей. Хату пабудаваў першы цесць Васіля Аляксеевіча – Максім. Савановічы да гэтага часу жывуць у Агародніках Падзерскіх (на Случчыне ёсць яшчэ Іванаўскія Агароднікі і Цараўскія Агароднікі).
Экспазіцыя традыцыйнага інтэр’ера хаты прысвечана тэме прадзіва і ткацтва, сенцы – дрэваапрацоўчым рамёствам.